IDOL angkinin mo na ako!

Madami akong hinahangaan na sikat na tao. Madami din akong bagay na kinaaliwan ko pag-sila ang nakikita at gumagawa ng kung ano man ang kinahahangaan ko sa kanila. Madami din akong gustong gawin para masabihan din akong idol (pero sa labas lang ng bahay namin e may tumatawag na sa akin ng idol hindi ko lang alam kung hanga sila sa akin o tawag lang). Iba ang Idol sa Crush. Ang Idol ay paghanga din tulad ng crush, pero ang Crush ay may halong pag-nanasa ngunit ang Idol Pag-hanga na may halong pang-gagaya.

Madami sa atin ang sikat na atin namang iniidolo ngunit alam niyo bang ang mga idolo natin ay may idolo rin. Tulad ko, Idol niyo ako ngunit may idol din ako (kapal ko?). Sa isang pagkakataon nalaman ko ang idol ko na graffiti artist eh may idol din pala at ang idol niya ay ginawa ko na ding idol. Pero sino ang idol ng idol ko ang ginawa niyang idol?.

Pag-sinabi mong idol mo ang isang tao malamang gagayahin mo siya at bibili ka ng kung ano man ang meron siya. Hindi maalis ang pang-gagaya sa idol mo. At hindi rin maalis na halos gawin mo na siyang Panginoon.

Isang beses ng mapagtripan kong mag-Bus na lang sa EDSA pauwi galing trabaho (dami kasing Spartan sa MRT), May pinapanood silang foreign films at patapos na. Pagtapos noon, sinalang ni manong kundoktor ang CD ng concert ni Michael Jackson. Unang bumungad ang sandamakmak na tao na tagahanga niya.Sobrang dami talaga na daig pa ang dagat ng basura sabi ni Manny Villar. Sa sobrang dami, hindi maiiwasan ang magkasakitan, ang iba ay naipiit, hinimatay,  nahubaran at iba pang pwedeng ikamatay. Tama nga ang hinala ko may namatay sa concert na iyon. Isang katabi ko ang nag-sabi na may namatay daw sa concert na yun. Hindi ko lang maiisip na handang ibigay ng mga tao na yun ang buhay nila  para lang makita na nagsasayaw at kumakanta sa intablado ang idolo. Meron pa ngang naiiyak, siguro hindi sila makapaniwala na napanood nila ng live ang idolo at meron namang nagpipilit umakyat ng intablado.

Hindi naman masama ang magkaroon ng idolo pero sana naman huwag kang makipagpatayan para lang sa kanila. Tao lang din ang iyong idolo at hindi Diyos na sinasamba. Hindi rin namang masamang mang-gaya pero lagi dapat isipin na sa kanya ang ginaya at hindi sayo. Sabi nga ni Heber huwag tayong mang-gaya kung hindi mo rin kaya at kung mang-gaya ka man siguraduhin mong mas maganda sa kinopyahan at matinong-matino (kanta ni  Francis M).

May mga idolo akong ginagaya ko din kung minsan pero hindi ko sinasamba. Bumibili din ako ng kung anong meron siya. Pero kahit minsan hindi sumulpot sa utak ko na makipagsiksikan, tulakan, suntukan, o agawan para lang sa kanya. Tao lang din siya nagkataon lang na magaling at kakaiba ang talento niya bilang tao. Lahat naman ng tao may talento kelangan lng madiskubre ng ng mismong ikaw. Mas masarap sigurong sumikat at kilalanin ng mga tao ang talagang ikaw.

Malaking impak talaga sa tao ang pagkakaroon ng idolo. Nagiging inspirasyon natin sila at tinutularan at hindi natin namamalayan na nahihigitan na natin sila.

Ang pinakamahalaga sikat ka man o hindi,  kelangan gusto mo o masaya ka sa ginagawa mo at hangat maari huwag makakasakit ng kapwa para lang sa minimithi.
~~idoljanz~~